Y Pwyllgor Materion Cyfansoddiadol a Deddfwriaethol

Offerynnau Statudol Gydag Adroddiadau Clir

3 Tachwedd 2014

CLA452 - Rheoliadau Cynllunio Glwad a Thref (Digolledu) (Cymru) (Rhif 2) 2014

Gweithdrefn: Negyddol

Gellir ymgymryd â rhai datblygiadau bychain heb ganiatâd cynllunio. Fodd bynnag, gall Gweinidogion Cymru neu’r awdurdodau cynllunio lleol dynnu nôl y fath hawliau datblygu a ganiateir (HDG). Nid yw hynny’n atal y datblygiad, ond bydd angen cael caniatâd cynllunio.

Pan:

• tynnir HDG yn ôl; a
• lle mae cais dilynol am ganiatâd cynllunio yn cael ei wrthod neu ei dderbyn gydag amodau newydd,

mae’r Rheoliadau hyn yn darparu nad yw Gweinidogion Cymru neu’r awdurdod cynllunio lleol yn atebol, mewn amgylchiadau penodol, am golledion uniongyrchol sy’n codi o’r tynnu nôl.

CLA453 - Gorchymyn Cynllunio Gwlad a Thref (Datblygu Cyffredinol a Ganiateir) (Diwygio) (Cymru) (Rhif 2) 2014

Gweithdrefn: Negyddol

Mae’r Gorchymyn hwn yn diwygio’r Gorchymyn Cynllunio Gwlad a Thref (Datblygu Cyffredinol a Ganiateir) 1995. Yn benodol, mae’n diwygio’r ‘hawliau datblygu a ganiateir’ sydd gan weithredwyr cyfathrebu electronig yng Nghymru. Mae’r Gorchymyn yn cynnwys nifer o ddiwygiadau manwl. Rhai o’r newidiadau mwyaf yw:

• gellir codi uchder mastiau presennol ffôn symudol o uchder sydd hyd at 15 o fetrau i uchder sydd hyd at 20 o fetrau, a gellir eu lledaenu gan hyd at draean,

• codi’r nifer a’r maint o antenna y gellir eu gosod ar rai mathau o adeiladau,

• gellir gosod polion telegraff, cabinetau a llinellau band eang mewn ardaloedd fel Parciau Cenedlaethol ac AHNEau heb ganiatâd o flaen llaw, yn ddarostyngedig i amodau penodol.

CLA454 - Rheoliadau Addysg (Unedau Cyfeirio Disgyblion) (Pwyllgorau Rheoli etc.) (Cymru) 2014

Gweithdrefn: Negyddol

Mae’r Rheoliadau hyn, a ddaw i rym ar 31 Hydref 2014, yn ei gwneud yn ofynnol i awdurdodau lleol sefydlu pwyllgorau rheoli i gynnal unedau cyfeirio disgyblion yn eu hardal, a gwneud darpariaeth ar gyfer cyfansoddiad a gweithdrefnau pwyllgor o’r fath.

CLA455 -  Rheoliadau Rheolaethau Swyddogol ar Fwyd Anifeiliaid a Bwyd (Cymru) (Diwygio) 2014

Gweithdrefn:Negyddol

Fel arfer, mae rhaid i hadau egin a fewnforiwyd o drydydd gwledydd (h.y. gwledydd tu allan i’r UE) fodloni safonau hylendid y CE. Fodd bynnag, mae’r CE wedi nodi nad yw rhai gwledydd yn bodloni’r safonau hynny. Felly, mae’r CE wedi penderfynu darparu rhanddirymiad tan 1 Gorffennaf 2015. Tan hynny, bydd rhaid i hadau egin dim ond bodloni profion microbiolegol penodol, a gynhaliwyd yn y trydydd gwledydd cyn allforio.

Mae’r Rheoliadau hyn yn gweithredu’r rhanddirymiad hwnnw yng Nghymru